In strada dee Cave, 'nà volta ghe jera 'nà vae

          Dopo circa un ano chè sò 'ndà a star via, dea contrada dee Cave me xè vegnù ea nostalgia, de ricordarme come na volta ea jera, prima de diventare come che ea xè, in stà nova era.
          CAVE! cussì i te gà ciamà tanti e tanti ani fa dopo che a chei tempi eà i gaveva cavà ea tera par fare i cavalcavia che, scavalcando ea fèrovia
sensa pericoeo, se podesse 'ndare in sità.
          Dove che xè stà cavà ea tera, là intorno ghe abitava poca e modesta zente, che pur avendo in sità chel pò pò de Università, piena de studiosi e cò tante menti eccelse.
          Lori, invesse, piuttosto ingenuamente, anche parchè i saveva poco più che gnente, i g'àveva imparà, sì scrivere, ma parlare come che ghe g'àveva insegnà sò mare.
                                   "Ea Vae" i ea g'à batezà

Strada xè stà ciamà quea che ghe passa in fianco, che univa ea strada che và sui monti cò quea che, ogni tanto, qualcuno el ciapava pà 'ndare al Campo Santo.
          Un cò, no i crede che sia stà vero, ma in mezo e dentro de tì, quanti e quanti giorni bei ghemo passà cò jerimo putèi.
          Sensa tanto consultare e insersion sul giornae, te savevi procurarne sia ea vacansa estiva che quea invernae. Ne faseva un bafo ea organizassion del Cobianchi, parchè noialtri, in mezo a tì, se divertivimo tuti quanti.
          Me struco el sarveo par domandarme come che fassa el Comune un cò, co chel pò pò de organizassion, far tanta fadiga a fare ea urbanizassion.
          Noialtri a chei tempi eà, sensa tanti progeti, ma in modo rassionae, in mèso a ea nostra vae, tuti i zughi g'à vudo nà giusta coeocassion, chè tuti noialtri praticavimo cò gusto e passion.
          So ea prima pagina de'a Domenega del Coriere, Walter Molino disegnava sene de guera e in vae provavimo come chè ea jera zugando in trincea contro squadre oposte.
          Usando finte, par munission, impacae dure cò l'aqua "bae de sabion". Frà na trincea e staltra scavavimo tunel e caminamenti, come nea guera del disdoto faseva i nostri combatenti.
          Più in là, in meso ae canee, se 'ndava a tardire par butare fora, se nò te crepavi, queo che ne gaveva mosso, dentro el pantasso, tuta ea ua che gavevimo magnà, dopo averla robà.
          Sul canton, dove che'a scumissiava, pà nà parte ea strada dea pompa e pà staltra ea stradea dei Magro e dei Galiassi, gavevimo anca el nostro picoeo San Siro.
          Proprio drio ea casa de Caseato, e pur essendo priviejio dei Sardena e Zotto, dei Magro e Maccato, quando eori no ghe jera, dò peade pier par tera e tiravimo anca nojaltri.
          In meso ghe jera dò canaete sempre piene de racoete che in està e cantava tute e sere e da come jera ea loro serenata, capivimo se l'indoman jera na bea giornata.
          Seguendo i trosi, saltando e canaete e più in là, dopo aver traversà un bel toco dè prà, se rivava finalmente in fossona, che un mito ea faseva insidiosa e misteriosa.
           Dentro ea fossona se faseva el deghejo. Intorbiando l'aqua vegneva a gaea pessegati e tenche. Insoma, cò e man se ciapava de tuto che par nojaltri poareti el jera come el merlusso.
           Sconti in meso ae piante, zogavimo a banditi e in campo aperto in meso al prà, armai de spade fate de legno, fasevimo i spadacini ripetendo e scene che g'àvevimo visto al cinema Casaini.
          Nò podevimo proprio lamentarse, e nò eo g'hemo mai fato. Pensè che ben esposta al soe, ma in parte vissin a ea canaeta che finiva davanti Carlo stueta, gh ejera un Residence de canee cò na bea pisineta.
          Ea jera stà fata de note da ea Divina Providensa mediante l'esplosion de na picoea bombeta. Tuti là dentro g'hemo imparà noare cavandose e mudande par no spetare che, dopo el soe, ne e dovesse sugare.
          Rivava l'autuno e pioveva, pioveva e cussì tuta ea vae de aqua se impieniva, coversendo tuto quanto de beo gavevimo costruio col nostro ingegno plebeo.
          Puntuae come sempre rivava l'inverno e inevitabilmente tuta ea vae se giassava. Tosi e tose tuti insieme sul giasso fasevimo sagra co'e issegaroe e patini de sgalmara.
          Sensa che te teo spetassi, capitava ea sorpresa, spesso o ogni tanto, te 'ndavi anca in essa. Quando sucedeva, tuti se rideva parchè dea festa anca queo parte faseva.
          Tuti quei come mi che stasevimo so ea strada podevimo goderse che'l bel panorama. Ne pareva de essere in riviera, anca s' el jera un sogno parchè vero no'l jera.
          Tornava ea primavera e l'aqua dea vae se sugava creando ogni volta el problema de 'nà nova lotizassion. Scumissiavimo cò fantasia a ricostruire el novo parco giochi, mejo de queo che gaveva trovà Pinochio nel paese dei balochi.
           Cara vae, par noaltri nò tè si stà banae. De tì no xè restà più gnente. El Comune te g'à stropà par necessità de spassio. Adesso te vivi nei ricordi e nea fantasia de chi te amava.
            Insima de tì, un cò ghe xè tanta zente che sensa renderse conto i xè drio calpestare drami, speranse, gioie e ilusioni. Insoma: tuto queo che'l nostro core no xè bon desmentegare.

Dolfo Tasca